Sapport Għall-Maniġment

L-irwol maniġerjali jinkludi responsabbiltajiet u dmirijiet varji, madankollu waħda li hija l-aktar ta’ sfida hija l-immaniġġjar tan-nies. Il-maniġers għandhom kemm l-opportunità kif ukoll ir-responsabbiltà li joħolqu ambjent tax-xogħol li joffri sapport u jippromwovi l-benessri tal-impjegati.           

Maniġers tajbin jeħtieġu li jkunu konxji li sabiex joffru sapport, l-ewwel iridu jieħdu ħsieb il-benessri tagħhom stess. Għaldaqstant, huwa importanti li jerfgħu r-responsabbiltà għall-attitudnijiet u l-imġiba tagħhom u kif dawn jistgħu jħallu impatt fuq it-tim tagħhom. Mod kif dan jista’ jsir huwa billi jkunu jafu liema servizzi ta’ sapport hemm disponibbli u biex jaċċessawhom jekk iħossu dan il-bżonn.  

Impjegati li jkunu qegħdin jiġu segwiti mill-Bord Mediku jistgħu jiġu riferuti lill-Employee Support Programme għal sapport addizzjonali b’relazzjoni mal-impjieg tagħhom u l-ħajja personali wkoll. Sapport bħal dan jista’ wkoll ikun essenzjali f’sitwazzjonijiet ta’ assenza minħabba mard, u l-proċess tar-ritorn għax-xogħol. L-Employee Support Programme jmantni wkoll komunikazzjoni bejn il-Bord Mediku u l-post tax-xogħol. Jekk tixtieq tirreferi impjegat għall-Bord Mediku, segwi din il-ħolqa.​ Jekk int interessat li tattendi sessjonijiet ta’ taħriġ relatati mal-immaniġġjar ta’ assenza minħabba mard u r-ritorn għax-xogħol, agħfas hawnhekk. 

Meta impjegat ikun se jerġa’ jidħol għax-xogħol wara assenza minħabba mard għal żmien twil, l-ESP Unit tista’ tipprovdi sapport biex tiġi żgurata tranżizzjoni lura għax-xogħol bla xkiel. Jingħata sapport kemm lill-impjegat u lid-dipartiment, skont kif meħtieġ, u dan jista’ jinkludi żjarat fuq il-post tax-xogħol jekk ikun neċessarju.

L-impjegati jew il-Kapijiet tad-Dipartimenti li jixtiequ jużaw dan is-servizz huma mitluba jikkuntattjaw lil Unit għal aktar informazzjoni. 

Il-Maniġment jistgħu jingħataw sapport  ukoll permezz tal-Bord Mediku. Il-Bord Mediku, li jaqa’ taħt ir-responsabbiltà tal-P&SD, għandu l-mira li jħeġġeġ lill-impjegati tas-servizz pubbliku biex jibqgħu jaħdmu u r-rwol primarju tiegħu huwa li jipprovdi gwida u sapport professjonali lill-impjegati f’termini ta’ saħħa fuq ix-xogħol.  Il-Bord Mediku huwa magħmul minn tim multidixxiplinarju ta’ professjonisti li jipprovdu rakkomandazzjonijiet dwar kwistjonijiet relatati ma’ diffikultajiet ta’ saħħa tal-impjegat u l-impatt tagħhom fuq il-prestazzjoni tal-individwu.  Wara li l-każ jiġi rivedut professjonalment, il-Bord Mediku mbagħad jagħmel kwalunkwe rakkomandazzjoni neċessarja bil-għan li joffri sostenn lill-impjegat filwaqt li jgħin ukoll lill-maniġment kif neċessarju.

Għal aktar informazzjoni tista’ taċċessa l-manwal tal-Bord Mediku billi tagħfas hawnhekk.